Բողոքը Սուխումում, որի մասնակիցները պահանջում են Աբխազիայի նախագահի հրաժարականը, շարունակվում է երրորդ օրը։ Ցույցի մասնակիցները շաբաթ օրը շարունակում են պահել Աբխազիայի նախագահի աշխատակազմի շենքը եւ պահանջում են նրա հրաժարականը, տեղեկացնում է ՏԱՍՍ-ը։
Կառավարական շենքի առջեւ մարդիկ գրեթե չկան, ցուցարարների հիմնական զանգվածը, որ մնացել է գիշերը, գտնվում է ներսում։ Հրապարակում եւ շենքում կան նաեւ ոստիկաններ եւ պետական պահպանության աշխատակիցներ։
«Ամեն ինչ դեմոկրատական ձեւով է ընթանում, առանց արյունահեղության եւ բախումների։ Մեր հիմնական խնդիրը նախագահի հրաժարականն է՝ երկրում կարգուկանոն հաստատելու նպատակով։ Նա պետք է հեռանա։ Ժողովուրդը նրան այս համակարգի հանդեպ անվստահություն է հայտնել՝ գալով այստեղ»,- գործակալությանն ասել է ցուցարարների շտաբի ներկայացուցիչը։ Նրա խոսքով՝ շաբաթ առավոտյան շենքում եւ հրապարակում ցույցի մոտ 600 մասնակից է եղել։
Այժմ Սուխումի կենտրոնում +3 աստիճան է, փոփոխական ամպամածություն։ Անձրեւ եւ քամի չկա։
Մինչ այդ հանրահավաքի կազմակերպիչներից Ախրա Ավիձբան տեղեկացրել էր, որ ցուցարարները պատրաստվում են հեռանալ Աբխազիայի նախագահի աշխատակազմի շենքից, հենց որ տեղի ունենան բանակցություններ ընդդիմության եւ հանրապետության ղեկավարի կողմնակիցների միջեւ։
Սուխումում հունվարի 9-ին Աբխազիայի նախագահ Ռաուլ Խաջիմբայի հրաժարականը պահանջող ցուցարարները ներխուժել են շենք։ Աբխազիայի նախագահը ԱԽ արտահերթ նիստ է հրավիրել, որից հետո բացառել է երկրում արտակարգ դրություն մտցնելու որոշումը։ Երկրի խորհրդարանը արտահերթ նիստում դիմել է նախագահին հրաժարականի կոչով։
Ուրբաթ Աբխազիայի Գերագույն դատարանը չեղարկել է երկրի ԿԸՀ որոշումը նախագահի ընտրությունների արդյունքների մասին եւ որոշել նշանակել նոր ընտրություններ։ Այսպիսով, դատական կոլեգիան բավարարել է ընդդիմադիր Ալխաս Կվիցինիայի վճռաբեկ բողոքը առաջին ատյանի դատարանի որոշման մասին, որն օրինական էր համարում նախագահի ընտրությունների երկրորդ փուլի արդյունքները։
